акафист иерусалимской иконе божией матери читать
Трофимов. Иерусалимская ик. Божией Матери. Акафист
Акафист Пресвятей Владычице нашей Богородице в честь чудотворныя иконы Ея, именуемыя Иерусалимския, составленный Александром Трофимовым по благословению Высокопреосвященнейшего ПРОКЛА, Архиепископа Симбирского и Мелекесского.
Вот утвержденный текст из книги ВОСКЛИКНИТЕ БОГУ ГЛАСОМ РАДОВАНИЯ (ПС.46,2). Акафисты. Издательство «Паломник», 2007.-896 с.
Акафистник можно приобрести в иконных лавках монастырей и храмов, а также заказать:
http://www.pravkniga.ru/akafistikanoni.html?id=4459
http://www.slovo.net.ru/books/?book=39810
http://www.idrp.ru/buy/show_item.php?cat=1121
http://www.ostrovknig.ru/vcd-6-2-726/goodsinfo.html
АКАФИСТ Пресвятей Владычице нашей Богородице в честь чудотворныя иконы Ея, именуемыя Иерусалимския
Избранней от всех родов Преблагословенней Деве Богородице благодарственная пения приносим о даровании нам предивныя иконы Ея Иерусалимския, многая чудеса изливающия, недугов исцеление, отраду и утешение верным подающия. Ты же, Всеблагая Заступнице, от всяких нас бед и напастей свободи, да зовем Ти:
Радуйся, Радосте наша, избави нас от всякия нужды и печали.
Архангелов и Ангелов лицы на Небеси и человеков множество на земли славят Тя, Царицу всех и Богородицу, яко даровала еси нам велию радость и утешение — образ Твой святый, пред нимже благоговейно предстояще, умиленно Тебе зовем:
Радуйся, от века предусмотренная Господом и Царем славы; радуйся, предочищенная чрез роды и роды праведников.
Радуйся, Пресвятая Дево, Самим Богом избранная в Матерь Сыну Божию; радуйся, достойный плоде праведных Твоих родителей Иоакима и Анны.
Радуйся, Богоневесто, воспитанная в земном дому Царя Небеснаго; радуйся, освященная Духом Святым.
Радуйся, обрадованная благовестием Архангела Божия; радуйся, верная Рабо Господня.
Радуйся, Марие, Мати Христа Бога нашего; радуйся, огнь Божества в Себе вместившая.
Радуйся, Превечнаго Совета Святыя Троицы всечудное совершение; радуйся, Владычице и Питательнице жизни нашея.
Радуйся, Радосте наша, избави нас от всякия нужды и печали.
Видяще честнии Херувими и славнии Серафими Тя, Богомати, во Царствии Небеснем предстоящую и молящуюся Богу за род христианский, благоговейно взирают на Тя, мы же зде на земли покланяющеся святей Твоей иконе, радостно взываем ко Всевышнему: Аллилуиа.
Проразумеша Духом Божиим апостоли Христовы, коль вожделенно будет верующым начертание пречистаго лика Твоего, Богородице, избраша евангелских таин благовестника Божественнаго Луку, яко живописца предивна, и той испроси от Тебе благословение написати первую икону Твою, Владычице, к нейже Сама рекла еси: «С сим образом благодать Моя и сила». Сего ради со умилением зовем Ти:
Радуйся, яко Сама благоизволила еси, да изображен будет лик Твой пречистый; радуйся, яко начертание лика Своего в залог любве Твоея нам оставила еси.
Радуйся, яко по отшествии Твоем на небо образ Твой святый истинное утешение бысть всем верующим; радуйся, яко взиравшии тогда на образ Твой облегчение в скорбех душевных обретаху.
Радуйся, яко вси христиане стекахуся в Гефсиманию образу Твоему поклонитися; радуйся, яко со слезами молящиися пред иконою Твоею исцеление в болезнех приимаху.
Радуйся, предивный образ Твой во утешение и освящение христианом даровавшая; радуйся, яко и ныне вси молящиися пред пречистым образом Твоим исполнение прошений приемлют.
Радуйся, благодать и милость чудотворною иконою Твоею нам являющая; радуйся, всем чтущим образ Твой святый милости богатыя подающая.
Радуйся, яко от дивныя иконы Твоея чудеса источаются; радуйся, покрывающая всех нас честным Твоим покровом.
Радуйся, Радосте наша, избави нас от всякия нужды и печали.
Сила благодатная, дарованная первописанней иконе Твоей, такожде проявися и во мнозех подобиих ея, егда преданная чада Твоя моляху апостолов умножити иконы Твоя, да вси имут их кийждо в дому своем, и прославляют Тя, Пречистая, воспевающе рождшемуся от Тебе Спасителю мира: Аллилуиа.
Имущи велию любовь к богодарованным Ти чадом Божиим, благословила еси, Всемилостивая, живописати изображения лика Твоего пречистаго во утешение и радость всем верою и любовию покланяющимся Сыну Твоему и Богу. Темже благодарственныя песни воспеваем к Богородице:
Радуйся, Ангелы хвалимая и воспеваемая от Серафимов; радуйся, Радосте всего мира.
Радуйся, Щите и Ограждение веры православныя; радуйся, предстательнице к Богу, мир от бед спасающая.
Радуйся, всю вселенную иконами Своими просветившая; радуйся, силу Твою благодатную и в сей иконе обильно явившая.
Радуйся, иконы Твоя на молитвенное общение нам даровавшая; радуйся, чрез них благодеяния миру источающая.
Радуйся, со иконами Твоими святыми невидимо в домы верных входящая; радуйся, благоговение и радость тем приносящая.
Радуйся, яко предстояще славней иконе Твоея, самой Тебе, истинней Матери Божией, покланяемся; радуйся, списки с иконы Твоея многими чудесы прославившая.
Радуйся, Радосте наша, избави нас от всякия нужды и печали.
Бурями житейскими обуреваеми и соблазны греховными одолеваеми, смиреннии и грешнии раби Твои, под милостивый покров Твой прибегающе, яко в тихое и безмолвное пристанище, прилежно молим Тя: пролей невидимо живительную благодать в души наша и умири жизнь нашу, да чистым умом и нескверными усты вопием всегда Богу: Аллилуиа.
Слышав царь греческий Лев, яко чудес множество и благодеяния неисчетная исходят от иконы Богоматере, яже во Иерусалиме, восхоте имети ю во стране своей, и егда принесен бысть образ преславный во святый Царьград, источи велия чудеса. Людие же, видевше таковую милость Божию, радостно взываху к Благословенней:
Радуйся, Благодатная, Царьград осенившая пречистаго образа Твоего пришествием; радуйся, Всенепорочная Дево, христианом всем всемилостивая Мати.
Радуйся, роду человеческому всемощная Заступнице; радуйся, милости Твоя на всех ближних и дальних простирающая.
Радуйся, двери милосердия Божия Твоим ходатайством отверзающая; радуйся, молитвами Твоими весь мир спасающая.
Радуйся, яко о всякой души христианстей всякое прошение приемлеши; радуйся, яко вся гласы, призывающия Тя отвсюду во вселенней, слышиши.
Радуйся, покровом Твоим весь мир христианский ограждающая; радуйся, от всякия скорби избавляющая рабы Твоя.
Радуйся, во благих желания наша дивно исполняющая; радуйся, Тобою бо имамы велие к Богу дерзновение.
Радуйся, Радосте наша, избави нас от всякия нужды и печали.
Боготечная звезда явися икона Твоя, Владычице, сиянием преславных чудес землю озаряющая, ибо вся чада Твоя, искупленная кровию Сына Твоего, прибегают к Тебе в нуждех и печалех. Овии убо молят Тя утолити скорби их душевныя и телесныя, инии же в начало путей своих благословение и благопоспешение в делех своих прияти от Тебе чают; друзии мира семейнаго, согласия и любве даровати им просят; угнетаемии же от злых человек защиты и покрова у Тебе ищут, и вся сия приемлюще, радостно вопиют Богу: Аллилуиа.
Видевше людие страны греческия, яко икона Твоя не токмо пучина чудес и неисчерпаемый источник исцелений им бысть, но и мощное одоление на супостаты, многажды изношаху ю пред полки вражиими, и тии бяху побеждаеми; вси же православнии, радости исполняхуся, славяще и воспевающе Тя:
Радуйся, Взбранная Воеводо, врага побеждающая; радуйся, от воинств небесных почитаемая.
Радуйся, гонителей веры Христовой силою Божиею посрамляющая; радуйся, Живоносный саде, увеселяяй сердца верных.
Радуйся, лукавых духов Прогонительнице; радуйся, от нашествия иноплеменных Избавительнице.
Радуйся, иконою Твоею, яко стеною нерушимою, люди Твоя ограждающая; радуйся, любящия и чтущия Тя от всяких бед спасающая.
Радуйся, яко во время брани победу христолюбивым воином подаеши; радуйся, страх и трепет на неверных иконою Твоею наводящая.
Радуйся, от разжженных стрел лукаваго нас защищающая; радуйся, яко одержимии духом нечистым пред иконою Твоею исцеляются.
Радуйся, Радосте наша, избави нас от всякия нужды и печали.
Проповедует мир весь милости, от иконы Твоея изливаемыя, Владычице, Ты бо Царьград от нашествия скифов спасла еси и воинству христолюбивому победу на сопротивныя даровала еси. Темже молим Тя: укрепи во бранех воинов, славящих Тя и поющих Сыну Твоему и Богу: Аллилуиа.
Возсия пречудная икона Божия Матере всей земли Русстей, егда великий князь Владимир с воинством своим вниде в пределы греческия, но благодатию Божиею просвещенный, прият веру православную во граде Корсуни. Тогда дадеся ему в благословение икона пречудная Иерусалимская, яко дар безценен, с неюже прииде князь в стольный град свой Киев. Людие же русстии, светом Христовым просвещаемии, со умилением взываху Богоматери:
Радуйся, честнейшая Херувим и славнейшая без сравнения Серафим; радуйся, Царице небесе и земли.
Радуйся, горняго мира Украшение; радуйся, дольняго мира Заступление.
Радуйся, яко иконою Твоею спасти нас пришла еси в землю Русскую; радуйся, страны нашея от века покрове и Заступнице.
Радуйся, яко дивная знамения иконою Твоею совершаются; радуйся, многими чудесы икону Твою Иерусалимскую прославившая.
Радуйся, Светом божественным от иконы Твоея души наша просвещающая; радуйся, ко Христу Богу всех нас приводящая.
Радуйся, почитанию святых икон нас наставляющая; радуйся, двери райския верным отверзающая.
Радуйся, Радосте наша, избави нас от всякия нужды и печали.
Хотяй привести ко Христу вся люди в державе своей и вся концы земли Русския просветити светом истиннаго боговедения, благоверный князь Владимир повеле святую икону Иерусалимскую пренести из града Киева в Великий Новград, и бе тамо икона сия лета многа, дондеже принесена бысть во град Москву, да источает чудеса в сердце России, идеже людие православнии, милостей и благодати Богоматере исполненнии, хвалебную песнь Богу воспевают: Аллилуиа.
Новая и дивная чудеса являеши, Мати Божия, умноживши чудотворныя иконы Своя во Отечествии нашем, ихже яко звезды небесныя разсеяла еси по всему лику земли Русския, подающи чрез них великая и неисчислимая благодеяния людем ея. Темже благоговеюще пред величеством славы Твоея, преклоньше колена пред пречистым образом Твоим, Преблагословенная, вопием Ти:
Радуйся, страны Российския Защитнице; радуйся, земли Русския Ограждение.
Радуйся, православную Россию возлюбившая; радуйся, чудотворными иконами Твоими сию обогатившая.
Радуйся, икону Твою Иерусалимскую в наследие нам от лет древних даровавшая; радуйся, яко сею иконою, аки облаком, благодатию и милостию всех покрываеши.
Радуйся, яко принесением иконы Твоея всяко место освящается и людие обновляются; радуйся, градов и весей земли нашея благодатное Охранение.
Радуйся, светлыми лучами чудес от святыя Твоея иконы страну Российскую озарившая; радуйся, яко и мы, грешнии, от бед и напастей чрез святую икону Твою избавляемся.
Радуйся, Отечества нашего благонадежное Утверждение; радуйся, Путеводительнице наша ко Отечеству Небесному.
Радуйся, Радосте наша, избави нас от всякия нужды и печали.
Странно есть уму человеческому, но дивно сердцу верующему видети, како от лика Твоего пречистаго чудотворное действо является: долгонедужнии и разслабленнии исцеляются, дуси тьмы прогоняются, в скорбех и печалех сущим утешение подается. Вси же видевшии чудеса сия, вкупе с исцеленными радостно воспевают Всещедрому Богу: Аллилуиа.
Весь мир любовию Твоею объемлющи, Пречистая, и ко всем сострадание имущи, благоволила еси прославите икону Твою Иерусалимскую во дни мора, егда страхом велиим сердца людей одержими бяху, темже вси в покаянии приходившии и со слезами молившиися Тебе во храме и в домех пред иконою Твоею, лютыя смерти избегаху и радостно вопияху Тебе таковая:
Радуйся, божественною силою Твоею силу естества побеждающая; радуйся, теплая о нас Ходатаице пред милосердным Богом.
Радуйся, сердечное сокрушение и покаяние истинное нам дарующая; радуйся, яко Тобою кающимся грешником прощение подается.
Радуйся, от всех лютых недугов врачующая; радуйся, из глубины погибели спасающая.
Радуйся, радостию духовною нас дивно насыщающая; радуйся, божественное Утешение роду христианскому.
Радуйся, в грозный день гнева Божия материнскую любовь и крайнее снисхождение нам являющая; радуйся, яко Твоими молитвами гнев Божий утишается.
Радуйся, всем сущым в бедах скорое Избавление; радуйся, Лествице, Еюже восходим от земли на небо.
Радуйся, Радосте наша, избави нас от всякия нужды и печали.
Всякое естество ангельское похвальная приносит Тебе, Владычице, человеческий же род славит Тя и почитает святую Твою икону, сию бо в покров и заступление даровала еси нам. Мы же, пред пречистым Твоим образом предстояще, молим Тя, о Мати Всеблагая, сохранити мир и тишину в стране нашей, избавити нас от волнений и смут, от междоусобныя брани и смертоносныя язвы, да вся чада Твоя в радости воспевают Спасителю и Богу нашему: Аллилуиа.
Ветии человечестии недоумевают познати тайну служения Твоего роду христианскому, ниже могут изъяснити силу благодати, иконе Твоей дарованную, ибо принесением ея на всяко место благодеяния источаются: идеже зной, тамо дожди обильны проливаются; а идеже пагубное безведрие, тамо солнце сияет и благорастворение воздухов пребывает. Людие же, Тобою помилованнии, величают Тя, Пречистая, тако:
Радуйся, трапезо святая, Хлебом Жизни нас питающая; радуйся, от глада душевнаго же и телеснаго предстательством Твоим всех верных сохраняющая.
Радуйся, от нашествия иноплеменных нас спасающая; радуйся, от междоусобныя брани истинным миром охраняющая.
Радуйся, от огня росою молитв Твоих нас ограждающая; радуйся, яко Тобою дожди благовременни и благорастворение воздухов нам низпосылаются.
Радуйся, принесением иконы Твоея от смертныя язвы нас исцеляющая; радуйся, от всех бед любовию Твоею нас заступающая.
Радуйся, от меча смертнаго силою Твоею нас избавляющая; радуйся, от потопа греховнаго нас возводящая.
Радуйся, Саде Земли Обетования; радуйся, всей вселенней крепкая Хранительнице.
Радуйся, Радосте наша, избави нас от всякия нужды и печали.
Спасительное пристанище даровася нам святая и дивная икона Твоя, Богородице Дево, с нею и доныне сила Твоя благодатная пребывает, веру в нас утверждает и на путь покаяния наставляет. Сего ради предстояще пред нею, молим Тя, Пречистая, помози нам безпорочно пройти путь жизни сея временныя, соблюди нас в чистоте и святости и приведи нас в Царствие Сына Твоего, да и мы, Тобою спасеннии, возможем тамо со ангелы и лики святых вечно воспевати хвалебную песнь Богу: Аллилуиа.
Стена еси и прибежище всем человеком, Владычице, к Твоему образу чудотворному притекающым. Темже молим Тя, огради нас от искушений и бед, от ополчений врагов наших видимых и невидимых; заступи, покрый, соблюди от всякаго зла всех поющих Ти с любовию таковая:
Радуйся, к Свету Истины нас возводящая; радуйся, в добрых делех Утверждение и Помоще.
Радуйся, вся наша желания ко благу и спасению всегда направляющая; радуйся, на всех стезях жизни милостивно нас оберегающая.
Радуйся, Хранительнице наша, от злобы бесовския невидимо нас ограждающая; радуйся, зависть и коварство злых человек премудро разрушающая.
Радуйся, заблуждающихся доброе Вразумление; радуйся, от огня геенскаго любящих Тя сохраняющая.
Радуйся, молитве сердечней нас научающая; радуйся, яко от всякия скорби раби Твоя избавляеши.
Радуйся, тихое пристанище всех к Тебе прибегающих; радуйся, яко невидимо нас благодатию в образе Твоем осеняеши.
Радуйся, Радосте наша, избави нас от всякия нужды и печали.
Пение хвалебное немолчно воспеваем пред пречистым образом Твоим, Богородице, яко молитвами Твоими к Сыну Твоему и Богу нашему грады и веси от злых обстояний охраняеши, мир и изобилие и вся благая в жизни всем чтущым Тя подаеши, всяк возраст на путь спасения наставляеши и всех призываеши воспевати милосердному Человеколюбцу Богу: Аллилуиа.
Светозарную икону Твою, о Мати Всеблагая, зрим в Божественных храмех и домех земли нашея, та бо светлыми лучами чудес просвещает нас, помраченных мглою греховною, и прогоняет всякое вражие действо силою Божиею. Сего ради и старии, и младии, и юнии, и дети радуются, имуще таковое утешение, и благодарственне взывают:
Радуйся, Мати Света Истиннаго, душы верных просвещающаго; радуйся, светлое благодати Познание.
Радуйся, младенцев Воспитание и благодатное хранение; радуйся, юности Охранительнице и Наставнице.
Радуйся, супругом любовь и согласие подающая; радуйся, в старости отраду и утешение людем в сердца проливающая.
Радуйся, яко чудесы от образа Твоего умы наша к горнему возвышающая; радуйся, храмы и домы наша иконою Твоею дивно освящающая.
Радуйся, ищущих Христова просвещения светом боговедения озаряющая; радуйся, скорбящих Радосте и плачущих велие Утешение.
Радуйся, державы нашея Российския светлое Просвещение; радуйся, светом радости души наша ободряющая.
Радуйся, Радосте наша, избави нас от всякия нужды и печали.
Благодать велия свыше дарована святей иконе Твоей, Преблагословенная Мати Божия, еже убогих назирати, болящих исцеляти, такожде помогати бедствующым, утешати скорбящих и всех заблуждших на путь истины обращати. Темже вси труждающиися и обремененнии, имуще в Тебе Благую Матерь и чрез Тебе неизглаголанныя милости приемлюще, умильно вопиют Богу: Аллилуиа.
Поюще чудеса Твоя, Богородительнице, имиже являеши нам многую любовь Твою и милосердие, восхваляем чудодейственную силу Твою, Всемилостивая Владычице наша; умири жизнь нашу, отжени от нас всякаго врага и супостата, простри нам руку помощи и приими нас в Царство Небесное, да всегда молитвами Твоими в любви Твоей пребывающе, со умилением сердечным зовем Ти:
Радуйся, Надеждо вечнаго спасения; радуйся, нынешняго скорбнаго века Утешение.
Радуйся, святыни источниче; радуйся, рода человеческаго Возвышение.
Радуйся, неистощимое Сокровище даров духовных; радуйся, нечаянную радость верным дарующая.
Радуйся, в скорбех и болезнех долготерпению нас научающая; радуйся, стопы наша на путь заповедей Господних направляющая.
Радуйся, Всемилостивая, в напастех скорая Заступнице; радуйся, слезами Твоими грехи наша омывающая.
Радуйся, искренне кающимся спасение; радуйся, яко молитвою пред иконою Твоею приемлем душевное утешение.
Радуйся, Радосте наша, избави нас от всякия нужды и печали.
О Всепетая Мати, Пречистая Госпоже Дево Богородице, приими сие малое моление наше и всесильным Твоим предстательством сохрани нас от всяких бед и напастей и вечныя изми муки всех, пред святою иконою Твоею с верою и любовию покланяющихся и о Тебе благодарно поющих Богу: Аллилуиа.
Этот кондак читается трижды, затем 1-й икос «Архангелов и Ангелов…» и кондак 1-й «Избранней от всех родов…»
Молитва Пресвятей Богородице в честь иконы Ея, именуемой «Иерусалимская»
О Пресвятая и Преблагословенная Мати Господа и Спаса нашего Иисуса Христа, Пречистая Приснодево Богородице Марие, державная Покровительнице и Заступнице наша! Припадаем и покланяемся Тебе пред святою и чудотворною Иерусалимскою иконою Твоею и смиренно молимся Тебе, благой и милосердной: вонми гласу молитв наших, от души приносимых Ти, виждь скорби и искушения наша и, яко воистину любвеобильная Мати, потщися помощи нам, безпомощным, унылым, во многая грехи впадающым и присно прогневляющым Господа и Создателя нашего. Еюже умоли, Владычице, да не погубит нас со беззаконии нашими, но ради Твоего предстательства явит нам человеколюбную Свою милость. Испроси нам, Всеблагая, здравие душевное и телесное, покаяние во гресех совершенное, преспеяние в добродетелех христианских благодатное, мирное и благочестное житие, земли плодоносие, воздуха благорастворение, дожди благовременны и благословение свыше на вся благая дела и начинания наша. Обитель святую, именем Твоим освященную, сохрани, и соблюди всех в мире и благоустроении, и споспеши всем нести иго Христово благое и легкое в терпении и смирении, во спасение душ наших, ограждающи нас Матерним покровом Твоим от искушений диавольских и всякаго зла. О Царице Всепетая, Мати Божия Всеблагая, простри богоноснеи руце Твои на умоление возлюбленному Сыну Твоему, Господу нашему Иисусу Христу, и приемши сомолитвенники к Нему, вкупе с Тобою на иконе Твоей изображенныя праведныя родители Твоя Иоакима и Анну, с ними умоли Его помиловати нас и избавити от погибели вечныя. И якоже иногда в скорби велицей пред сею иконою Твоею молившемуся Нилу утешение и обетование благое даровала еси, тако и ныне нас, смиренных и грешных, молящихся услыши и яви нам великия щедроты Твоя: болящыя исцели, скорбящыя утеши, бедствующыя от бед избави, путешествующыя и в море плавающыя невредимы сохрани и вся ны сподоби благочестно житие наше земное скончати, благую христианскую кончину получити, Святых Таин причастники быти и Небесное Царствие унаследовати. Да во свете и радосте святых поем и величаем милосердие Твое и рождшагося от Тебе Господа нашего Иисуса Христа, Емуже со Безначальным Его Отцем и Пресвятым Духом подобает всякая слава, честь и поклонение во веки веков. Аминь.
Пресвятая Госпоже, Владычице Богородице, упование всех уповающих на Тя, Заступнице печальных, прибежище отчаянных, вдов и сирот Питательнице! Услыши и помилуй ны, грешныя и недостойныя рабы Твоя, со умилением ко пречистому Твоему образу припадающия: умоли, милосердная Владычице, Сына Твоего и Господа нашего Иисуса Христа, да отвратит от нас праведный гнев Свой, да простит грехи и беззакония наша, яко да сподобимся благостию Его скончати житие наше в покаянии и получити милость Его со всеми избранными Его, яко благословена и препрославлена еси во веки веков. Аминь.
Иерусалимстей иконе Пресвятыя Богородицы
Богорадованная Владычице, / препрославленная Мати щедрот и человеколюбия, / всемилостивая о всем мире Ходатаице, / прилежно раби Твои ко Твоему предстательству прибегаем, / и ко пречудному образу Твоему со умилением, припадающе, молимся: / молитву теплую Сыну Твоему и Богу нашему сотвори, / о Всепетая Царице Богородице, / да от всяких болезней и печалей нас Тебе ради избавит, / и от грехов всяких свободив, / Царствия Своего Небеснаго наследники ны покажет: / велие бо и неизреченное яко Мати к Нему дерзновение имаши / и вся от Него испросити можеши, // едина во веки преблагословенная.
Твоего предстательства уверение / и милосердия Твоего явление / икона Иерусалимская нам, Владычице, показася, / пред неюже души наша в молитве изливаем / и верою Тебе вопием: / воззри, Милосердая, на люди Твоя, / вся скорби наша и печали утоли, / утешение благое в сердца наша низпосли // и спасение вечное душам нашим, Пречистая, испроси.
Не отрини, о Милосердая Мати, / слез и воздыханий наших, / но прошения наша милостивно приимши, / пред Иерусалимскою иконою Твоею / молящихся людей веру укрепи, / умилением сердца их исполни / и крест земнаго жития нести им помози, // елика бо хощеши, можеши.
*Богородица Иерусалимская Акафист
Акафист Пресвятой Богородице пред иконой «Иерусалимская»
Кондак 1
Избранней от всех родов Преблагословенней Деве Богородице, яко Матери Господа и Бога нашего, похвальное пение приносим. Ты же, яко Заступница рода человеческаго, подаеши страждущим отраду, болящим исцеление, от наветов вражиих защиту, всем же молящимся Тебе скорое услышание. Темже в радости и умилении вопием Ти: Радуйся, Радосте наша, избави нас от всякия нужды и печали.
Икос 1
Архангелов и Ангелов лики на небеси и человеков множество на земли славят Тя, Царицу всех и Богородицу, яко даровала еси нам велию радость и утешение – образ Твой святый, пред нимже благоговейно предстояще, умиленно Тебе зовем:
Радуйся, от века Господом и Царем Славы предусмотренная.
Радуйся, чрез роды родов праведников предочищенная.
Радуйся, Святейшая Дево, Самим Богом в Матерь Сыну Божию избранная.
Радуйся, достойный плоде праведных родителей Твоих Иоакима и Анны.
Радуйся, Богоневесто, в земном дому Царя Небеснаго воспитанная.
Радуйся, благовестием Архангела Божия Гавриила обрадованная.
Радуйся, паче всех жен рождением от Тебе Спасителя мира возвеличенная.
Радуйся, Радосте наша, избави нас от всякия нужды и печали.
Кондак 2
Видящи Тя, Пресвятая Дево, в славе неизреченней Богу предстоящую и за род христианский Ему прилежно молящуюся, честнии Херувимы и славнии Серафимы, окружающии вседержавный Престол Пресвятыя Троицы, радостно покланяхуся. Мы же зде, на земли, Твоей святей иконе предстояще, всем сердцем о Тебе радуяся, благоговейно взываем ко Всевышнему Богу: Аллилуиа.
Икос 2
Видящи икону Твою, Дево Богородице, юже всехвальный евангелист Лука написа, рекла еси о ней пречистыми усты Твоими: «Благодать Рождшагося от Мене и милость Моя с сею иконою да пребудут». Сего ради, таковое Твое обетование уведевше, со умилением зовем Ти:
Радуйся, яко благоизволила еси икону Твою в благословение Церкви даровати.
Радуйся, яко начертание лика Твоего в залог любве Твоея нам оставила еси.
Радуйся, яко образ Твой святый всем верующим во утешение бысть.
Радуйся, яко христиане в Гефсимании образу Твоему, яко живей Ти сущей, покланяются.
Радуйся, яко взирающии на лик Твой святый облегчение в скорбех душевных обретают.
Радуйся, яко со слезами молящиися пред иконою Твоею исцеление в болезнех получают.
Радуйся, яко вси исповедающии Тя яко Матерь Божию исполнение прошений своих приемлют.
Радуйся, Радосте наша, избави нас от всякия нужды и печали.
Кондак 3
Сила благодатная, Тобою дарованная первописанней иконе Твоей, и во иных подобиях ея пребывает, пред нимиже вернии, радуяся и благоговея, прославляют Тя, Святейшую Матерь Всесильнаго Бога, вопиюще Ему: Аллилуиа.
Икос 3
Имущи велию любовь к людем, искупленным Кровию Сына Твоего, приемлеши всякаго человека, молящагося пред образом Твоим святым. Сего ради Тя по долгу ублажаем:
Радуйся, Ангелы хвалимая и Серафимы воспеваемая.
Радуйся, яко Тобою вся вселенная радости и веселия исполняется.
Радуйся, яко иконы Твоя на радость и утешение нам явила еси.
Радуйся, яко чрез них благодеяния многоразличныя миру всему источаеши.
Радуйся, яко силу Твою благодатную и сей иконе обильно даровала еси.
Радуйся, яко святою иконою Твоею Сама невидимо с нами пребываеши.
Радуйся, яко предстояще святей иконе Твоей, Тебе Самей, истинней Матери Божией, покланяемся.
Радуйся, Радосте наша, избави нас от всякия нужды и печали.
Кондак 4
Треволнении житейскими обуреваеми и соблазны греховными одолеваеми, под Твой милостивый покров прибегаем мы, грешнии и смиреннии раби Твои, яко к тихому и безмятежному пристанищу, и прилежно молим: пролей благодать Твою в души наша, да чистым умом и нескверными усты вопием выну о Тебе Богу: Аллилуиа.
Икос 4
Слышав греческий царь Лев, яко чудес велие множество и благодеяния неисчетная источаются от иконы Богоматере, яже во Иерусалиме, восхоте имети ю во стране своей; и егда принесена бысть сия в Царьград, – источи зде премногия чудеса. Людие же, видевше таковую милость Божию, в несказанней радости взываху к Преблагословенней:
Радуйся, Прерадованная, Царьград осенившая Твоим пришествием.
Радуйся, Благодатная, всем христианом Всемилостивая Мати.
Радуйся, яко о всякой души христианстей всякое прошение приемлеши.
Радуйся, яко вся гласы, отвсюду призывающия Тя, слышиши.
Радуйся, яко покровом Твоим весь род христианский покрываеши.
Радуйся, яко благодать и милость Твою на всех ближних и дальних простираеши.
Радуйся, яко всем вся благая в жизни сей милостиво подаеши.
Радуйся, Радосте наша, избави нас от всякия нужды и печали.
Кондак 5
Боготечная звезда явися нам образ Твой святый, Владычице; сего ради притекающии к Тебе кийждо нужды своя и потребы пред ним приносят: овии убо молят Тя утолити скорби их душевныя и телесныя, инии же в начало путей своих благословение и благопоспешение в делех своих прияти от Тебе чают, друзии же мира семейнаго, согласия и любве даровати им испрошают, угнетаемии же от злых человек защиты и покрова у Тебе ищут, и вся сия приемлюще, радостно вопиют Сыну Твоему и Богу: Аллилуиа.
Икос 5
Видевше людие страны Греческия, яко икона Твоя не токмо пучина чудес и неисчерпаемый источник исцелений им бысть, обаче и мощное одоление на супостаты, многажды изношаху ю пред полчища вражия, и тии бяху выну побеждаеми. Сего ради радостно воспеваху Ти:
Радуйся, Взбранная Воеводо, враги побеждающая.
Радуйся, яко безоружным нам на всеоружных победу подающая.
Радуйся, устрашение на неверных иконою Твоею наводящая.
Радуйся, Непобедимая Воеводо во бранех на враги христианския.
Радуйся, иконою Твоею, яко стеною нерушимою, люди Твоя ограждающая.
Радуйся, от многоразличных бед, зол и напастей нас спасающая.
Радуйся, беснующихся от демонскаго удручения свобождающая.
Радуйся, Радосте наша, избави нас от всякия нужды и печали.
Кондак 6
Проповедует мир весь милости, от иконы Твоея изливаемыя, Владычице, Ты бо всякия болезни чрез сию исцеляеши и скорби утоляеши. Сего ради со благоговением почитаем многоцелебный образ Твой, и поклоняющеся ему, яко залогу Твоего к нам благоволения, вопием Богу: Аллилуиа.
Икос 6
Возсия пречудная икона Божия Матери Иерусалимская в земли нашей, егда сия, яко дар многоценен, святым князем Владимиром в стольный град Киев принесена бысть, людие же, светом Христовым просвещаемии, Царице Небесней во умилении тогда взываху:
Радуйся, честнейшая Херувим и славнейшая без сравнения Серафим.
Радуйся, горе превознесенная, обаче молениям долу живущих выну внемлющая.
Радуйся, всем хотящим спастися икону Твою чудотворную во спасение даровавшая.
Радуйся, яко нас, во тьме греховней седящих, под Твой всемощный покров прияла еси.
Радуйся, светом божественным от иконы Твоея всех нас просвещающая.
Радуйся, ко Христу Богу всех нас приводящая.
Радуйся, райския двери всем нам отверзающая.
Радуйся, Радосте наша, избави нас от всякия нужды и печали.
Кондак 7
Хотящи благоверный князь Владимир вся люди, сущия в державе его, ко Христу привлещи и светом истиннаго боговедения просветити, повеле дарованную ему царем греческим святую икону Иерусалимскую из Киева в Великий Новград пренести, и бе тамо икона сия лета многа, дондеже принесена бысть во град Москву, да источает сия чудеса, людие же православнии, благодати и милостей от Богоматери исполненнии, хвалебную песнь Богу да воспевают: Аллилуиа.
Икос 7
Удивил еси на нас милости Твоя, Господи, умножив чудотворныя иконы Пречистыя Твоея Матере во отечестве нашем, ихже, яко звезды небесныя, разсеял еси по всей земли нашей, подавая чрез них великия и неисчетныя благодеяния благочестивым людем. Темже, благоговея пред величеством славы Твоея и преклоняя колена сердец наших пред пречистым образом Преблагославенныя Твоея Матери, умильно вопием Ей:
Радуйся, страну нашу велиею любовию возлюбившая.
Радуйся, чудотворными иконами Твоими сию обогатившая.
Радуйся, икону Твою Иерусалимскую в наследие неоцененное нам от лет древних даровавшая.
Радуйся, яко сею иконою, аки облаком, благодатию и милостию всех покрываеши.
Радуйся, яко принесением иконы Твоея всяко место освящается и людие обновляются.
Радуйся, яко от иконы Твоея источники чудес всюду источаются.
Радуйся, яко и мы, грешнии, иконою Твоею от бед и напастей избавляемся.
Радуйся, Радосте наша, избави нас от всякия нужды и печали.
Кондак 8
Странно есть уму человеческому и дивно сердцу верующему видети, како от лика Твоего, на дске изображеннаго, многая чудеса содеваются: сила бо многа, от иконы Твоея исходящая, долгонедужныя и разслабленныя исцеляет, бесы прогоняет, скорби и напасти утишает. Мы же, видевше чудеса сии, вкупе с исцелевшими радостно восклицаем Всещедрому Богу: Аллилуиа.
Икос 8
Весь мир любовию Своею объемлющи, Пречистая, и ко всем сострадание имущи, благоволила еси прославити икону Твою Иерусалимскую во дни мора смертнаго, егда страхом велиим сердца всех одержими бяху. Темже вси в покаяние тогда пришедшии и со слезами Тебе во храмех и в домех своих молившиися внезапныя смерти избегаху, радостно взывая благодарственная пения таковая:
Радуйся, теплая о нас пред Богом Ходатаице.
Радуйся, яко Твоими молитвами гнев Божий утоляется.
Радуйся, яко Тобою кающимся грешником прощение подается.
Радуйся, на путь истинный заблуждшия обращающая.
Радуйся, ко смирению гордыя и жестокосердныя приклоняющая.
Радуйся, материнскую любовь и крайнее снисхождение нам являющая.
Радуйся, чтущим Тя усердно обители небесныя приуготовляющая.
Радуйся, Радосте наша, избави нас от всякия нужды и печали.
Кондак 9
Вся земля наша под осенением честныя иконы Твоея пребывает и сильным предстательством Твоим хранима есть; мы же непрестанно молим Тя, Благую Матерь нашу: сохрани нас в мире и тишине, избави от волнения и смуты, от крамолы и междоусобныя брани и от всякия смертоносныя язвы, да вси во благочестии пребывая, воспеваем Богу: Аллилуиа.
Икос 9
Ветия многовещанныя не могут изъяснити силу благодати, иконе Твоей дарованную, ибо принесением ея во всяко место благодеяния различны источаются: идеже засуха бе – тамо дожди обильны проливаются, идеже пагубное безведрие – тамо солнце возсиявает и поветрия зловредны изменяются, человецы же, Тобою тако помилованнии и облагодетельствованнии, из глубины души взывают Ти:
Радуйся, Трапезо Святая, Хлебом Жизни нас питающая.
Радуйся, от глада душевнаго и телеснаго предстательством Твоим всех верных сохраняющая.
Радуйся, Владычице, яко Тобою дожди благовременны и благорастворения воздуха нам низпосылаются.
Радуйся, теплая Предстательнице наша, пагубныя удары грома и молнии от нас отводящая.
Радуйся, огнь, поядающий домы и пажити людския, росою молитв Твоих угашающая.
Радуйся, яко принесением иконы Твоея пагубы смертныя люди избегают.
Радуйся, яко притекающии у чудотворному образу Твоему милости от Тебе приемлют.
Радуйся, Радосте наша, избави нас от всякия нужды и печали.
Кондак 10
Надежное пристанище верным среди бурь и волнений моря житейскаго Ты еси, Пречистая Дево, указующее нам путь ко отечеству Небесному. Помози убо нам, о Богомати, безпреткновенно путь жития сего временнаго проити, соверши нас во всякой добродетели и соблюди в чистоте и святости, приведи нас в блаженное Царствие Сына Твоего, да и мы, Тобою спасеннии, возможем тамо со Ангелы и лики святых выну воспевати Богу хвалебную песнь: Аллилуиа.
Икос 10
Стена и прибежище верным во всяких обстояниях и напастех Ты еси, Богородице Дево, предстательством бо Твоим ограждаеши нас от искушений и бед, нас обышедших; сего ради, со слезами, вопием Ти:
Радуйся, Хранительнице наша, от злобы бесовския невидимо нас ограждающая.
Радуйся, зависть и коварство злых человек премудро разрушающая.
Радуйся, на всех стезях жизни нашея милостиво нас сохраняющая.
Радуйся, вся наша мысли от злых приражений и суетных мечтаний очищающая.
Радуйся, вся наша желания во благо и спасение направляющая.
Радуйся, добро творити, во славу Божию, нас наставляющая.
Радуйся, Путеводительнице наша, во блаженное отечество нас руководящая.
Радуйся, Радосте наша, избави нас от всякия нужды и печали.
Кондак 11
Пение хвалебное немолчно воспевают Ти, Богородительнице, вси роди христианстии, ибо непрестанными молитвами Твоими к Сыну Твоему и Богу нашему грады и веси от злых обстояний сохраняеши, мир и изобилие и вся благая всем чтущим Тя подаеши, всяк возраст на путь спасения наставляеши и всех призываеши воспевати Милосердному Человеколюбцу Богу: Аллилуиа.
Икос 11
Светом божественным пречистыя души Твоея всю вселенную просвещаеши, Владычице, и иконою Твоею сердца всех веселия и радости исполняеши; сего ради старии и младии, и всяк возраст согласно Тебе зовет:
Радуйся, отраду и утешение в сердца наша изливающая.
Радуйся, младенцем благое воспитание и преуспеяние разума к восприятию полезных учений подающая.
Радуйся, юных в целомудрии наставляющая и в девственней чистоте души их соблюдающая.
Радуйся, благословенное совершение христианских супружеств.
Радуйся, добрым земледельцем плодородие у Бога испрошающая.
Радуйся, право куплю деющим и всем в Бозе труждающимся пособствующая.
Радуйся, путешествующим и по морю плавающим милостиво сопутствующая.
Радуйся, Радосте наша, избави нас от всякия нужды и печали.
Кондак 12
Благодать велия дана Ти есть от Бога, Преблагословенная Мати Божия, еже убогия назирати, болящия исцеляти, такожде бедствующим помогати, скорбящия утешати и всех заблуждших на путь спасения обращати. Темже вси труждающиися и обремененнии, от Тебе, Благая Мати, неизглаголанныя милости приемлюще, умильно вопиют Сыну Твоему: Аллилуиа.
Икос 12
Поюще чудеса Твоя, Богородительнице, имиже являеши нам милосердие Твое, восхваляем Тя, Владычице, и, предстояще пречистому образу Твоему, молим Тя: утоли наша печали и избави нас от всякаго зла, да всегда в любви к Тебе пребывающе, во умилении сердечнем зовем Ти:
Радуйся, всем скорбящим и обремененным утешение и радость приносящая.
Радуйся, сущим в бедах и напастех скорую помощь посылающая.
Радуйся, в болезнех Тя призывающим исцеление подающая.
Радуйся, любовию Твоею ожесточенно враждующих примиряющая.
Радуйся, сирот незримая Воспитательнице и вдовиц благая Покровительнице.
Радуйся, в час смертный едина наша надеждо, отрадо и утешение.
Радуйся, и по смерти нашей у Престола Всевышняго о нас теплая Ходатаице.
Радуйся, Радосте наша, избави нас от всякия нужды и печали.
Кондак 13
О Всепетая Мати, Царице Небесная, рождшая Христа Сына Божия, Спасителя миру! Приими ныне сие малое моление наше и всесильным Твоим предстательством сохрани нас в жизни сей от всяких бед и напастей и сподоби в блаженстве вечнем со всеми святыми хвалу Богу воспевати: Аллилуиа.
(Этот кондак читается трижды, затем икос 1 и кондак 1)