акафист иконе ты еси лоза
Акафист Пресвятой Богородице пред иконой «Услышательница»
Кондак 1
Избранней от всех родов Божией Матери и Царице, непрестанно у Престола Сына Своего молящейся о нас, с любовию благодарственная приносим пения. Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти: Радуйся, Всеблагая Владычице, молений наших скорая Услышательнице.
Икос 1
Ангельский собор на небеси немолчно воспевает Тя, Владычице, и мы земнороднии, притекающе к иконе Твоей, «Услышательница» именуемой, из глубины сердца взываем Ти:
Радуйся, яко о Тебе радуется Ангельский собор и человеческий род.
Радуйся, яко слава Твоя превосходит похвалы небесныя и земныя.
Радуйся, милость Свою чрез чудотворныя иконы Твоя нам свыше посылающая.
Радуйся, Всеблагая наша Наставнице, любовию Твоею нас к Себе привлекающая.
Радуйся, источающая великия милости и щедроты любящим Тя.
Радуйся, скоропредстательная Помощнице всем призывающим Тя.
Радуйся, Всеблагая Владычице, молений наших скорая Услышательнице.
Кондак 2
Видящи, Всенепорочная, благое желание преподобнаго Космы, взывающаго к Тебе: «Пресвятая Богородице! Помолись Сыну Твоему и Богу, да наставит мя на путь спасения!», благоволила еси предстательство Свое пред Сыном Своим милостиво ему явити, да Христу воспевает выну: Аллилуиа.
Икос 2
Разумев Промышление Божие о себе преподобный Косма, в дивнем гласе от иконы Твоея, Премилостивая, изшедшем: «Сыне и Боже Мой! Научи раба Твоего Косму, како ему спастися!», возопи к Тебе, благой Услышательнице молений наших, во умилении сердечнем таковая:
Радуйся, Мати Света Невечерняго и Духа Святаго селение.
Радуйся, Неувядаемый Цвете нетления и Ангельских сил ликование.
Радуйся, скорая Услышательнице усердно Тебе молящихся.
Радуйся, непостыдное упование к Тебе притекающих.
Радуйся, безчисленныя щедроты Своя всем милостиво подающая.
Радуйся, Купино неопально горящая, духовною радостию нас утешающая.
Радуйся, Всеблагая Владычице, молений наших скорая Услышательнице.
Кондак 3
Силою Вышняго и благодатию Твоею, Владычице, укрепленный святый Косма, егда слышаше на моление Твое ответствующий глас Творца своего: «В безмолвии да послужит Ми!», возблагодари Его за благостное попечение о себе песнию: Аллилуиа.
Икос 3
Имуще таковую Попечительницу о спасении нашем и источник неоскудеваемый небесных дарований, иноцы Святыя Горы Афонския притекающи к пречудному образу Твоему «Услышательница» именуемому, благодарными усты вопиют Ти, Богородице:
Радуйся, Пресвятая Дево, жребием Своим Гору Афонскую наименовавшая.
Радуйся, Пречистая, многими чудесы сию Святую Гору ознаменовавшая.
Радуйся, молитву угодника Твоего Космы скоро услышавшая.
Радуйся, и наша усердная моления не отвергающая.
Радуйся, икону Твою святую верным в помощь даровавшая.
Радуйся, знамении и чудесы сию прославившая.
Радуйся, Всеблагая Владычице, молений наших скорая Услышательнице.
Кондак 4
Бурю внутрь имеяй помышлений сумнительных, преподобный Косма дивяшеся, видев Жену царственныя красоты во обители Ватопедстей, Яже Сама властительно в церкви и трапезе повеления различная всем сказующи. Познав же в Ней Царицу Небесную, о насельницех обители пекущуюся, в веселии сердца возопи Богу: Аллилуиа.
Икос 4
Слышавше о чуде скораго услышания Пречистою Богородицею моления раба Своего, в обители Зографстей бывшем, иноцы Горы Афонския радовахуся, видевше новое явление милосердия Твоего, о, Богомати. Сего ради благодарственно вопием Ти сице:
Радуйся, благ временных и вечных усердная нам Ходатаица.
Радуйся, двери Царствия Христова верным отверзающая.
Радуйся, любовию Твоею нас на небеса возводящая.
Радуйся, благоутробие Сына Своего к нам приклоняющая.
Радуйся, Божия милости и любве преизобильное исполнение.
Радуйся, вопиющих к Тебе скорое услышание.
Радуйся, Всеблагая Владычице, молений наших скорая Услышательнице.
Кондак 5
Боготечная звезда явися нам, Владычице, честная Твоя икона «Услышательница», лучами чудес Твоих мрак печалей и мглу всяческих недугов и скорбей от сердец наших прогоняющая, и наставляющая на путь спасения всех с верою к Тебе притекающих и вопиющих Богу: Аллилуиа.
Икос 5
Видяще токи чудес, от святыя иконы Твоея «Услышательницы» источаемыя, вси иноцы Горы Афонския и окрестных стран стекахуся к ней на поклонение. Ты же, Преблагая, всем дары милости Твоея неоскудно подаеши от чудотворнаго образа Твоего, подвизая с благодарностию вопити Тебе:
Радуйся, Радосте наша и Утешение.
Радуйся, Покров наш и ограждение.
Радуйся, немощи наша душевныя и телесныя врачующая.
Радуйся, сердца наша любовию Твоею умягчающая.
Радуйся, от греховнаго падения нас избавляющая.
Радуйся, ум наш на небеса возводящая.
Радуйся, Всеблагая Владычице, молений наших скорая Услышательнице.
Кондак 6
Воспеваем дивное милосердие Твое к нам и велие снисхождение, Пресвятая Дево, не престаеши бо молитися о нас, грешных, пред Престолом Сына Твоего и Бога нашего, еже отвратити гнев Его, праведно на ны движимый, и помиловати всех верно вопиющих: Аллилуиа.
Икос 6
Возсиявает в душах наших, скорбию и унынием омраченных, благодатнаго утешения свет, и сердца наша веселия и радости исполняются, егда Ты, Владычице наша Преблагая, вразумляеши нас вопити к щедрому Богу, да милостив будет нам, грешным, и простит нам согрешения наша. Не премолчи убо, Владычице, молящися о нас, зовущих Ти со умилением:
Радуйся, скорбь нашу в радость претворяющая.
Радуйся, неизреченную сладость верным изливающая.
Радуйся, духовных очей наших прозрение.
Радуйся, скорбящих отрадо и увеселение.
Радуйся, в скорбех и недузех долготерпению нас научающая.
Радуйся, немощных благодатным Покровом Твоим покрывающая.
Радуйся, Всеблагая Владычице, молений наших скорая Услышательнице.
Кондак 7
Хотящи явити токи милостей и щедрот от иконы Твоея «Услышательница», сию не токмо в Горе Афонстей, но и в подобиих ея новыя возжегши светильники, во иных градех и весех прославила еси, да спасаемии Тобою от бед, Сыну Твоему вопиют: Аллилуиа.
Икос 7
Новое чудо милосердия Твоего зрим, Пречистая, в явлении чудотворнаго образа Твоего, к немуже припадающе и помощи от Тебе просяще, и Тобою вразумляеми и наставляеми вопием Ти:
Радуйся, теплая Ходатаице о живущих в жребии Твоем — Святей Горе Афонстей.
Радуйся, обитающим зде всех благ Подательница.
Радуйся, на всяком месте призывающих Тя спасающая.
Радуйся, от бед и напастей всех заступающая.
Радуйся, иконам Своим силу чудодействовати даровавшая.
Радуйся, Ликом Твоим нас утешающая.
Радуйся, Всеблагая Владычице, молений наших скорая Услышательнице.
Кондак 8
Странно и сумнительно неверующим слышати, Мати Царя Небеснаго, како на икону Твою святую вернии людие очима своима и умиленными душами взирающе, от скорбей избавляются и от бед сохраняются. Мы же, внимая слову Твоему, Владычице, реченному к первописанней иконе Твоей: «Благодать Рождшагося от Мене и Моя с сею иконою да будет», — веруем, яко и сия икона Твоя «Услышательница» благодать Твою источает. Темже благоговейно покланяющеся, лобызаем ю, вопиюще Богу: Аллилуиа.
Икос 8
Всем верным утешительно есть взирати на святую икону Твою, Владычице, на нейже зрим Тя, на руку Твоею Предвечнаго Младенца Господа нашего Иисуса Христа держащую, Емуже покланяющеся боголепно яко Сыну Твоему и Богу нашему, Тебе, истинней Богородице, со умиленнием глаголем:
Радуйся, горняго и дольняго мира Всецарице.
Радуйся, небесе и земли Владычице.
Радуйся, Путеводительнице к небу первейшая.
Радуйся, со Ангелом хранителем — Хранительнице наша усердная.
Радуйся, любящих Сына Твоего чады Своими именующая.
Радуйся, молитвы наша приятными Богу соделовающая.
Радуйся, Всеблагая Владычице, молений наших скорая Услышательнице.
Кондак 9
Всякаго естества ангельскаго превысшая явилася еси, Пресвятая Дево, Бога бо зачала еси плотию, Невместимаго во утробе Твоей вместила еси. Темже вси роди блажат Тя по долгу, благословенная Марие Богородице, от востока бо и до запада хвально имя Твое, иноков же лицы Покровительницу Тя свою именуют, наипаче же подвизающиися в жребии Твоем — Горе Афонстей, юже особым благоволением Твоим осенила еси, многая чудеса в ней содевающи и милости Твоя богатыя насельником ея являющи, да благодарно вопиют о Тебе Богу: Аллилуиа.
Икос 9
Ветии человечестии недоумеют восхвалити по достоянию славное, Владычице, иконы Твоея явление и дивная чудотворения Твоя, людем православным источаемая. Мы же, неисчетныя чудеса иконою Твоею являемая видевше, душею и сердцем радуяся, Тебе глаголем:
Радуйся, радость благодатную нам изливающая.
Радуйся, утешение духовное нам подающая.
Радуйся, на небесех царствующая и нас доле не оставляющая.
Радуйся, житие наше земное во благо устрояющая.
Радуйся, покаянием нашим двери райския нам отверзающая.
Радуйся, вечною радостию души наша озаряющая.
Радуйся, Всеблагая Владычице, молений наших скорая Услышательнице.
Кондак 10
Спасти хотящи люди Своя от обдержащих скорбей и болезней, даровала еси нам, Владычице, честную икону Твою «Услышательницу», да видяще являемую Тобою милость, вопием со умилением Богу, усыновившему нас Тебе при Кресте Своем и даровавшему нам таковую Путеводительницу на небо: Аллилуиа.
Икос 10
Стена еси заступления, Преблагословенная Дево, и столп крепок от лица вражия всем подвижником благочестия: Тебе бо дадеся велия сила на темныя силы адския. Сего ради вернии согласно Тебе зовут:
Радуйся, матернею любовию Твоею весь мир христианский объемлющая.
Радуйся, сострадания к страждущим преисполненная.
Радуйся, на стезю спасения верных наставляющая.
Радуйся, к благочестию и целомудрию жизнь нашу направляющая.
Радуйся, обителей иноческих неусыпная Блюстительнице.
Радуйся, домов и семейств благочестивых неустанная Хранительнице.
Радуйся, Всеблагая Владычице, молений наших скорая Услышательнице.
Кондак 11
Пение наше, не довлеющее к достойному прославлению милостей Твоих, Преблагословенная, обаче от полноты любве и усердия Тебе приносимое, не презри и не отвратися от нас, недостойных, но помози нам, Всеблагая, покаянием очиститися от скверны греховныя и преуспети в чистем и богоугоднем житии, да воспоминая неисчетная чудотворения Твоя, вопием Верховному Творцу чудес Богу: Аллилуиа.
Икос 11
Светоподательными лучами чудес святая икона Твоя немерцаемо сияет, Всемилостивая Владычице, и весь мир христианский благодатно просвещает, прогоняющи всякое вражие действо силою Божиею, от нея исходящею. Сего ради грядут к ней от лет древних на поклонение православных собори, умиленно воспевая пред нею благохваления таковая:
Радуйся, руце Твои за ны ко Господу простирающая.
Радуйся, непрестанно Ему молящаяся о нас.
Радуйся, недужным источник исцелений неоскудный.
Радуйся, разслабленным телом и духом врачевание скорое.
Радуйся, николиже верных заступлением не оставляющая.
Радуйся, во всем упование на Бога имети нас научающая.
Радуйся, Всеблагая Владычице, молений наших скорая Услышательнице.
Кондак 12
Благодать Божия, причастная иконе Твоей, «Услышательницею» нареченней, влечет к ней всех скорбящих и обремененных, и не тщи отходят они от сего источника Твоих милостей и щедрот: в скорбех отраду, в напастех защиту, в болезнех цельбу неоскудно получая, и благодарственно вопиют Сыну Твоему и Богу хвалебную песнь: Аллилуиа.
Икос 12
Поюще чудеса Твоя, Владычице, хвалим Тя, яко Живоносный Источник благодати, яко неистощимую реку чудес, и припадая усердно ко святей иконе Твоей, лобызаем ю с сердечною любовию и молим Тя: воззри на ны милосердием Твоим, смиренно приносящих Ти песни таковыя:
Радуйся, бедствующим благая Помощнице.
Радуйся, молящихся скорая Услышательнице.
Радуйся, яко в светлую ризу непорочности облещися нам пособствуеши.
Радуйся, яко сретению Жениха Христа предуготовляти нас тщишися.
Радуйся, стати одесную Бога на Страшнем Суде Христовом нам ходатайствующая.
Радуйся, внити в брачный чертог Сына Твоего и Бога нашего помогающая.
Радуйся, Всеблагая Владычице, молений наших скорая Услышательнице.
Кондак 13
О, Премилостивая Мати Сладчайшаго Господа нашего Иисуса Христа, во святей иконе Твоей Услышательницею нарекшаяся! Приими милостиво сие малое моление наше и исполни во благих прошения наша: даруй нам вся потребная к жизни и благочестию, избави нас от бед, болезней и печали и Царствия Небеснаго наследники всех сотвори, верно вопиющих Богу: Аллилуиа.
(Этот кондак читается трижды, затем икос 1 и кондак 1)
Молитва Пресвятой Богородице
О, Преблагословенная Владычице, Приснодево Богородице, скорая Услышательнице всех, к Тебе с верою прибегающих! Призри с высоты небеснаго величия Твоего на нас, к чудотворному Твоему образу припадающих и, услышав смиренную молитву нашу, умоли Сына Твоего и Бога нашего да сохранит в мире и благоденствии страну нашу, да укрепит Церковь Православную и непозыблему соблюдет ю от неверия, ересей и раскола. Избави всех, о, Всеблагая, с верою Тебе молящихся, от падений греховных, от навета злых человек, от бед, скорбей и болезней. Даруй нам дух сокрушения, смирение сердца, чистоту помышлений, исправление греховныя жизни и оставление согрешений наших; да вси, благодарне воспевающе величия Твоя, сподобимся Небеснаго Царствия и тамо со всеми святыми прославим пречестное и великолепое имя в Троице славимаго Бога: Отца и Сына и Святаго Духа. Аминь.
Тропарь, глас 3
Твоего предстательства уверение и милосердия Твоего явление икона Твоя «Услышательница» нам, Владычице, показася; пред неюже души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли, моления наша скоро услыши и спасение вечное душам нашим, Пречистая, испроси.
Кондак, глас 3
Днесь, Владычице, преподобный Косма к иконе Твоей с мольбою припаде и Тобою скоро услышан бысть, непрестанно Тебе хвалу воздая. И нам, под священный покров Твой прибегающим, да дарует Господь оставление грехов и велию милость.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.
Акафист Пресвятой Богородице пред иконой «Аз есмь с вами, и никтоже на вы» (Леушинская)
Кондак 1
Взбранной Воеводе, невечерняго Света Родительнице, предивной Заступнице рода христианскаго, Божественное знамение спасения — Христа Богомладенца на руку Своею держащей, молитвам Церкве земныя внемлющей, благоизволившей от святыя Своея Леушинской иконы изливати нам струи благодатных исцелений, похвальная восписуем Ти, Всесвятая Богородице. Ты же, Всемилостивая Царице, яко имущая державу непобедимую и милосердие неисчетное, от всяких нас бед и скорбей присно свобождай, да зовем Ти:
Радуйся, земли Российския отрадо и всему миру прибежище и утешение.
Икос 1
Архистратиг Михаил и вся небесныя силы песнословят Тя, Владычице, Честнейшую Херувим и Славнейшую без сравнения Серафим, сущую Богородицу; и мы грешнии на земли, подобяся сим безплотным силам, и радуяся первым глаголам радости, принесенным Тебе Архангелом Гавриилом и праведною Елисаветою, купно с ними из глубины сердца нашего вопием Ти:
Радуйся, Благословенная Дщи Отца Небеснаго;
Радуйся, Неискусобрачная Родительнице Бога Слова.
Радуйся, всенепорочное селение Духа Святаго;
Радуйся, Небесная Царице, Мати Господа небеси и земли,
Радуйся, архангелов и ангелов Владычице,
Радуйся, горних сил величание,
Радуйся, человеческих ликостояний похваление,
Радуйся, страны Российския во Христе утверждение
Радуйся, земли Российския отрадо и всему миру прибежище и утешение.
Кондак 2
Видят Тебя, Пречистая Матерь Христова, все Силы Небесные, выну предстоящую пред Престолом Божиим за всех христиан молящуюся Сыну и Богу Твоему. Мы же, грешные, созерцая образ Твой, «Азъ есмь с вами и никтоже на вы» именуемый и к нему с надеждою велиею припадая, Тебе Самой радостно поклоняемся, Господеви взывая: Аллилуия.
Икос 2
Разум благопросвещен имеюще, святые праотцы и пророци Иаков, Моисей, Давид и других множество в словесех, видениях, сониих чудное Рождество Твое и тайну Приснодевства Твоего изобразиша. Проразумеша духом Божиим апостоли Христовы, коль вожделенно будет для верующих начертание на деке святейшего лика Пречистой Девы Богоматери, избраша из среды себе божественного Луку, яко живописца предивна. И той, испроси Матернее от Тебе благословение, подкрепляемый постом и молитвою, написа первую икону Тебе Владычеце, к ней же Сама рекла еси: с образом сим будут благодать Моя и сила. Сего ради со умилением и любовию воспеваем Тебе:
Радуйся, Лествице высокая, землю с Небом совокупльшая;
Радуйся, Бога, на земле явльшагося, во чреве Твоем понесшая и яко Неопалимая Купина нетленною пребывающая.
Радуйся, светоносный Облаче, из Него же всех Владыка, яко дождь на руно, на землю сниде;
Радуйся, яко Живоносный Источник, алчбу и жажду вечныя правды в людех возгревающая.
Радуйся, Христа, манну жизни, во чрево Свое вместившая и души наша хлебом безсмертия насыщающая;
Радуйся, чудный Жезле, цветами добродетелей верных украшающая.
Радуйся, яко молящиеся Тебе от всякаго зла сохраняются.
Радуйся, яко Твои честныя иконы чудесами прославляются;
Радуйся, земли Российския отрадо и всему миру прибежище и утешение.
Кондак 3
Силою Твоей многомощной молитвы обрати на путь покаяния и нас, имущих слабую волю удобопреклонную греху, яко согрешаем ежечасно пред Сыном Твоим и Богом. Не тщимся воспрянути от сна греховнаго, и не разумеваем, како жизнь наша преходит, яко день вчерашний, иже мимо иде, но яви нам милосердие Твое, еже с надеждой вопити Тебе: Аллилуиа.
Икос 3
Имущи Матернюю любовь к людем, восприяла еси в сыновство весь род людской вкупе со святым апостолом Иоанном, егда Сын Твой Божественный на Древе Крестнем рекл еси: «Жено, се, сын Твой»; и с Ним мир возлюбила еси. Ныне же просимтя: не престай, Пречистая, теплотою любве Твоея, яко Мати всех, в скорбех и печалех, и напастех житейских сущих, умоляти Всещедраго Бога, да дарует земли нашей мир и безмятежие, Церкви же Святей непоколебимое благостояние, да от всех зол Тобою избавляеми, вопием Ти :
Радуйся, тяжкое житие наше облегчающая,
Радуйся, лютыя беды и напасти отгоняющая.
Радуйся, от душевныя туги и уныния спасающая;
Радуйся, безпомощным на помощь ускоряющая.
Радуйся, в самих страданиях утешение подающая.
Радуйся, яко Тобою злые начинания пресекаются;
Радуйся, яко тобою добрые желания наша исполняются
Радуйся, огнем Матерния Твоея любве души согревающая;
Радуйся, земли Российския отрадо и всему миру прибежище и утешение.
Кондак 4
Бурю земнаго скорбнаго жития нашего в немощех и болезнех видящи, Премилосердная Мати Божия благоизволи явити чудо явления образа своего, и мы с радостию несказанною припадаем к Тебе, Владычице, и из глубины души благодарим Тя, дивную Заступницу, воспевающе Богу: Аллилуиа.
Икос 4
Слышавше горячие молитвы болярыни Виктории Пушкиной, дщерь благословенную даровала еси ей, Пречистая Богородице, иже честно послужи матери своей земной, а послеже и в обителех российстиих подвиги монашескими и молитвами всеусердными угоди Тебе и Божественному Сыну Твоему. Мы, с радостию и умилением воспоминая милости твои, преподобней матери нашей Таисии, верной служительнице твоей, величая Тя, Всенепорочная Мати Божия и с надеждою смиренно приносим ти похвалы сия:
Радуйся, унывающих Твоим человеколюбием ободряющая.
Радуйся, маслино благоплодная, елеем милости сердца наша умащающая.
Радуйся, радосте наша, от всякия скверны плоти и духа нас очищающая;
Радуйся, Целительнице наша, болезней душевных и телесных нас избавляющая.
Радуйся, похвало наша, радостей духовных нас не лишающая;
Радуйся, Владычице наша, помощию Твоею недуги наша исцеляющая.
Радуйся, прибежище наше, от врагов видимых и невидимых нас покрывающая;
Радуйся, Трапезо святая, хлебом жизни нас питающая;
Радуйся, земли Российския отрадо и всему миру прибежище и утешение
Кондак 5
Яко боготечней звезде покланяемся ныне пречестней иконе Твоей «Азъ есмь с вами и никтоже на вы именуемой», зряще ю источником многих исцелений и кладезем всемощныя помощи. О, Любвеобильная Мати Дево, к роду человеческому Божественною милостию преисполненная, просим Тя: спасай и ныне во всей вселенней беспомощные души людские, во мраке греховном погибающие. Страждущие бо сердца, яко реки многоводные, текут к сердцу Твоему материнскому, к сему дивному источнику любви и милосердия, Мы же благодарне за Матерь таковую рода нашего вопием Предвечному и Милосердному Богу: Аллилуиа.
Икос 5
Видевше преславную обитель Леушинскую трудами христиан благочестивых в северных пределех державы Российстей устрояемую, благоволила еси, Преблагословенная Царице Небесная, новый удел земной зде основати и в явлениех Твоих преславней матери нашей Таисии возвестила еси волю Твою и милости твои инокиням и миряном обильно источила еси. Мы же, веруя несомненно, яко и ныне не оскуде благосердие твое к нам, величаем тя сице:
Радуйся, яко Тобою благоволение Отчее познахом;
Радуйся, яко Тобою любовь Сына Божия стяжахом.
Радуйся, благодатию Святаго Духа нас озаряющая
Радуйся, вся печали мира в молитвах собирающая;
Радуйся, Церкви Христовой лоно непорочныя чистоты;
Радуйся, Воплощение Божественныя красоты
Радуйся, в скорбех и отчаянии сущих благою надеждою укрепляющая.
Радуйся, во дни и в нощи омофором Твоим нас покрывающая;
Радуйся, земли Российския отрадо и всему миру прибежище и утешение
Кондак 6
Проповедница великаго и неизреченаго милосердия твоего явися богопросвещенная игумения Таисия, иже внимая велением Твоим, Всесвятая Богородице, благословила инокиню Алипию дивный образ Твой на дсце написати и Духом Святым вдохновляемая икону сию «Азъ есмь с вами и никтоже на вы» нарекла еси. Сие же ныне поминающе, просим Тя, о всепетая Мати, милостиво простри Твой взор, и нам возвести о милости снисхождения всерадостным гласом Твоим, глубокие раны умягчи елеом безмернаго милосердия Твоего. Мы же, обрадованные Твоею к нам материнскою любовию, с ликованием возглашаем о тебе Богу: Аллилуиа.
Икос 6
Возсияла еси яко солнце истинное во иконе Твоей Леушинстей, всесвятая Богородице, лучами матерныя любве Своея нас согревающи; сего ради со смирением молим Тя: умилосердися, Госпоже Пресвятая, на бедствующими людьми, избави нас от всех напастей, бед и скорбей, находящих на ны за грехи нашя, да Тобою радости причастницы бывше, зовем Ти:
Радуйся, к свету истины прельщенныя обращающая.
Радуйся, благоговети пред святыней научающая.
Радуйся, ревностию ко спасению воодушевляющая;
Радуйся, духовное нечувствие в нас подавляющая.
Радуйся, храмы Божий почитати внушающая;
Радуйся, в них отраду находити вдохновляющая.
Радуйся, жажду Святаго Причащения возбуждающая;
Радуйся, веру и любовь к Богу воспламеняющая.
Радуйся, земли Российския отрадо и всему миру прибежище и утешение
Кондак 7
Хотяще Человеколюбец Господь спасти человека от вечныя смерти даде в помощь и заступление Матерь Свою. И никто не отыде тощ и неуслышан от образа Твоего, «Азъ есмь с вами и никтоже на вы» именуемого; сия убо ведующе преподобная Таисия в обители своея учреди чин неусыпаемого чтения акафистов, дабы ангелоподобно всяк час прославляти Тя, Дево и Матерь Всевышнего. Мы же, ведуще, яко усердие оскуде наше, на милость твою, Пренепорочная Богородице, уповаем и в покаянии слезно глаголем Сыну Твоему: Аллилуиа.
Икос 7
Радуйся, яко душевредныя учения низлагаеши;
Радуйся, яко истину познавати помогаеши.
Радуйся, мрак хулы, срамословия и всякия лжи разсееваши;
Радуйся, светом Святаго Евангелия люди просвещаеши.
Радуйся, чудесы Твоими кроткими к покаянию нас наставляющая;
Радуйся, в вере истинней теми нас утверждающая.
Радуйся, удивления празднаго от нас не приемлющая;
Радуйся, всецелаго обращения от всея души нашея взыскующая.
Радуйся, земли Российския отрадо и всему миру прибежище и утешение
Кондак 8
Странники и пришельцы есмы на земли и, по глаголу апостола, не имамы зде пребывающаго града, но к кому прибегнем, Владычице, в скорбех странствия нашего, аще не к Тебе, Всеблагая? Ты бо бедствующих всех Помоще и обидимых Заступнице благая, Мати Божия Пречистыя. Многоскорбных нас Ты не оставляющая, но после скорбных бед нам радости дающая. Молим Тя, Владычице, сохрани нас от падений греховных, от соблазнов и неправды, да не погибнем люте, без покаяния, и да сподобимся со всеми чистыми сердцами воспевати Богу: Аллилуйя.
Икос 8
Все упование свое на Тя, Царице Небесная, возложих во дни велиего испытания военного Преподобный и Богоносный Старец Серафим Вырицкий, подъяв подвиг неустанней тысячедневной молитвы пред Леушинскою иконою твоею за народ свой, в борьбе с супостаты зело страждущий, веруя несумненно в предстательство Твое пред Престолом Святыя Троицы. Возстающии же убо на Бога не познают, коль сильна есть молитва Божией Матери. Мы же о Твоем всемощном заступлении, помощи и благословении добре ведуще, славословим Тя сице:
Радуйся, зависть, клевету, ревность и злопамятство истребляющая;
Радуйся, братолюбием нас ущедряющая.
Радуйся, от глада, хлада, труса, потопа, огня, меча ограждающая;
Радуйся, хлебом насущным нас питающая.
Радуйся, смертоносную язву прекращающая;
Радуйся, гнев Божий, праведно на ны движимый, утоляющая.
Радуйся, праведных дел наших поспешение;
Радуйся, на всех путех жизни нашея промышление.
Радуйся, земли Российския отрадо и всему миру прибежище и утешение
Кондак 9
Всяк земнеродный да взыграется духом просвещаем и да ликует, славяще, Богомати Пречистая, светлое торжество образа Твоего «Азъ есмь с Вами и никтоже на вы» именуемаго и да вопиют вси купно с небесными силы бесплотными гласом архангельским:
Радуйся Благодатная, Господь с Тобою, и Тобою с нами воспевающими Ему песнь: Аллилуиа
Икос 9
Витийствующий язык не возможет достойно восхвалити Тя Богородице, яко всем благая подаеши, Дева Всепетая, коемуждо по потребе: болящим здравие, обидимым покров и защищение, алчущих хлебом питаеши, слепым зрение даруеши; вразуми всех заблудших и настави на путь покаяния да согласно с нами взывают Ти:
Радуйся, яко Тобою злые начинания пресекаются;
Радуйся, яко тобою добрые желания наша исполняются.
Радуйся, огнем Матерния Твоея любве души согревающая;
Радуйся, благодатию Святаго Духа нас озаряющая.
Радуйся, стоящих за правду защищение;
Радуйся, томимых горькими работами облегчение.
Радуйся, яко невинно осужденных свобождаеши;
Радуйся, яко из изгнания скоро возвращаеши.
Радуйся, земли Российския отрадо и всему миру прибежище и утешение
Кондак 10
Спасительный промысел Господень явила еси, Всесвятая Богородице, егда бурею страстей греховных обуреваемые, народы российские от веры отеческия отхождаху и заповеди Христовы нарушаху, просветивши верных чад Божиих, яко Ты еси якорь спасения и свет во тьме мира, просвещаяй ослепленных гордынею житейскою, и подвизаяй Сыну Твоему возносити песнь покаяния и благодарения: Аллилуиа.
Икос 10
Стена необоримая и заступление всемощное всему миру христианскому даровася образ Пречестей Матери Божий Леушинской, его людие благочестивыя в годину смут и гонений на Церковь Христову сохраниша от поругания безбожников, веруя, яко всем с верою и любовию притекающим к Тебе, Пречистая Владычице, даруешь грехов прощение, с Сыном Твоим и Богом примирение, скорбей утоление и радости возвращение; тем же молим Тя: заступи и покрый и огради всех нас от искушений, озлоблений и бед с любовию взывающих Ти сице:
Радуйся, радосте наша, от всякия скверны плоти и духа нас очищающая;
Радуйся, Целительнице наша, болезней душевных и телесных нас избавляющая.
Радуйся, бедныя души наша, огнем Духа Святаго, на подвиг любве согревающая и укрепляющая.
Радуйся, всех под Твой покров и защищение Матерые приемлющая;
Радуйся, в подвиге веры изнемогающих молитвам их внемлющая.
Радуйся, болящия и безнадежныя от одра болезни возставляющая;
Радуйся, всякую ненависть, злобу, вражду в нас укрощающая;
Радуйся, мир о Дусе Святе в сердце вселяющая.
Радуйся, земли Российския отрадо и всему миру прибежище и утешение!
Кондак 11
Пение наше, аще и тмочисленное бы было, не довлеет к достойному прославлению многих милостей Твоих и щедрот, Преблагословенная Матерь Господа нашего, имиже непрестанно благодетельствуеши роду нашему: обаче да не неблагодарни явимся пред Тобою, Благодетельнице наша, по силе нашей благодарственныя песни Тебе приносим с верою и любовию, и прославляя неисчетная чудотворения Твоя, вопием Верховному Творцу чудес Богу: Аллилуиа.
Икос 11
Светозарная свеща, сущим во тьме греха и юдоли плача явися Леушинская икона Твоя, Пречистая Владычице, юже сохраниша благочестивыя христиане в земли малоророссийстей: всем бо притекающим к ней струи исцелений изливаеши и чудес зарями сердца верных веселиши, подвизающи взывати Тебе сице:
Радуйся, младенцев воспитание;
Радуйся, отрокам смысла Подательнице.
Радуйся, юношей Руководительнице;
Радуйся, добрых дев величание.
Радуйся, возрастных и мужей премудростию обогащающая;
Радуйся, жен стыдением и кротостью наделяющая.
Радуйся, старцев благоговейных сладкое успокоение;
Радуйся, стариц боголюбивых тихое прибежище.
Радуйся, земли Российския отрадо и всему миру прибежище и утешение!
Кондак 12
Благодатию Твоею, Владычице, и ныне всем верою притекающим к цельбоносней иконе Твоей не оставляеши Призывающим Имя Твое, Святое услыши, подая благословение супружествам, вступающим во брачную жизнь, учащимся помощи, вдовам и сиротам защиту и спасение, больным и недужным здравие и укрепление, и вся по коегожде потребе благая утешения, да вси Тобою сохраняеми Господу вопиют: Аллилуйя.
Икос 12
Поющие многобразныя Твоя чудеса, Владычице Богородице, во спасение рода человеческого содеянныя, молим Господа и Владыку всяческих, да подаст нам Духа кротости ко славе Божией работати и сердце милующее, иже в Тебе, николиже оскудеет и во всех, зовущих Ти сице:
Радуйся, слезами сокрушения бездну беззаконий наших омывающая;
Радуйся, от напрасныя смерти и недугов лютых спасающая;
Радуйся, христианския кончины нас сподобляющая.
Радуйся, в страшный час смерти нам помогающая;
Радуйся, и по исходе из тела душы верных от горьких мытарств и темных духов защищающая.
Радуйся, кающимся грешником на суде Божии крепкое Заступление;
Радуйся, всеблагая Вратарнице, райския двери нам отверзающая;
Радуйся, в Царство славы Христовы на безконечныя веки нас водворяющая
Радуйся, земли Российския отрадо и всему миру прибежище и утешение
Кондак 13
О, Всепетая Мати, Похвало Леушинская и всего мира Надеждо и Утешение, для утешения страждущих великаго Искупителя преславно рождшая, от нас недостойных сии мольбы с любовью приими, десницею милости Твоея к страждущим сердцам милостиво простри, слезы плачущих отри, всем ищущим материнския помощи Твоея, даруй благие щедроты любвеобильнаго сердца Твоего: да во святых дивных добродетелех Твоих восхвалим Отца Вседержителя, Сына Божия Искупителя, и Духа Святаго Утешителя, воспевая : Аллилуиа. Аллилуиа. Аллилуиа.
Этот кондак читается трижды, затем Икос 1-й и Кондак 1-й
Молитва
О Пресвятая Дево, Мати Господа, Царице Небесе и земли! Вонми многоболезненному воздыханию души нашея, призри с высоты святыя Твоея на нас, с верою и любовию поклоняющихся Пречистому образу Твоему. Се бо грехми погружаемии и скорбьми обуреваемии, взирая на Твой образ, яко живей Ти сущей с нами, приносим смиренная моления наша.
Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорбь нашу, настави на путь правый нас заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину, и на страшном суде Сына Твоего явися нам Милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.