величание святым отцам шести вселенских соборов
Канон Памяти святых отец Вселенских шести Соборов.
Тропа́рь отце́в, гла́с 8:
Препросла́влен еси́, Христе́ Бо́же на́ш, свети́ла на земли́ отцы́ на́ши основа́вый, и те́ми ко и́стинней ве́ре вся́ ны́ наста́вивый, Многоблагоутро́бне, сла́ва Тебе́.
Кано́н отце́в. Гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Иже от Нике́и, я́коже от не́коего небесе́, всю́ду возгреме́вше Сло́во Жива́го Отца́ и Сего́ показа́вше враги́, гро́мом избие́ны, свяще́нными словесы́ да почту́тся.
Духобо́рцев ду́х лука́вый Святы́м Ду́хом Христо́с от Своея́ Це́ркве дале́че отгна́, вторы́м де́йством Собо́ра совокупи́в.
Христобо́рца пре́лесть изгна́ Несто́рия Кири́лл, Собо́ра нача́льник, и́же я́сно Де́ву Мари́ю испове́да, Бо́гу Ма́терь чи́стую.
Богородичен: Несозда́нныя Тро́ицы Еди́наго Христа́ во двою́ естеству́ и хоте́нию, Чи́стая, ражда́еши, соедине́ние челове́ком и Ангелом Тебе́ ра́ди соде́лавшаго.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Тва́ри служи́тель я́влься Арий безу́мный, и Македо́ний па́ки ме́рзок я́влься, в гее́нне о́гненней ра́вно му́чатся со е́ллины.
Седмию́ Собо́ры свяще́нными святы́х оте́ц честну́ю Це́рковь уясни́л еси́, Христе́, я́коже седми́х свети́льник све́том пре́лести тму́ прогна́в дале́че.
Ста́до Твое́, Сло́ве, погубля́ет многообра́зная кра́ста ерети́к, па́стырие же Твои́х слове́сных ове́ц уче́нием сие́ премени́ша.
Богородичен: Еди́наго родила́ еси́, Пречи́стая, от Несозда́нныя Тро́ицы во двою́ существу́ и хоте́нию, Его́же о́бразу честно́му покланя́емся, благода́ти исполня́еми.
Та́же седа́лен отце́в, гла́с 4.
Свети́льницы пресве́тлии и́стины Христо́вы ми́ру яви́стеся на земли́, вои́стинну блаже́ннейший, отцы́ боговеща́ннии, изсуши́вше е́реси ху́льных языковре́дий и угаси́вше пламенови́дная злосла́вных смуще́ния: те́мже, я́ко святи́телие Христо́вы, моли́теся спасти́ся на́м.
Сла́ва, и ны́не, Богородичен:
Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Врази́ Твои́ возшуме́ша, и ненави́дящии Тя́ главу́ воздвиго́ша, Спа́се, вма́ле, но а́бие падо́ша, не терпя́ще гла́са тру́б духо́вных.
Со́лнца Со́лнцы сугу́бо озари́ша, Сы́н и Ду́х от Отца́, несозда́ни, Собезнача́льни: Обои́м Оте́ц Еди́н вино́вен ве́руется.
Се́дмь у́бо духо́в, и́же почи́ша на Христе́, Иса́ия сие́ рече́, на седми́х же Собо́рех почи́ Христо́с со Отце́м и Боже́ственным Ду́хом.
Богородичен: Бо́га родила́ еси́, пло́ть носи́вшаго, от чи́стых Твои́х крове́й, Отрокови́це Чи́стая, Его́же, сугу́ба естество́м, во Ипоста́си же еди́ней, отцы́ пропове́даша.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Боже́ственный виногра́д Христо́в, и́же от Еги́пта пренесе́н, те́мнаго отча́янна губи́теля зве́рие пе́рвее пояда́ху, пра́щею же святы́х оте́ц дале́че отгна́шася.
Боже́ственным сия́нием трисия́нным у́м просве́щше, честни́и отцы́ Еди́наго пропове́даша Честны́я Тро́ицы Христа́ Го́спода, сугу́ба естествы́ и хоте́нии.
Тро́ичен: В ве́щных, я́коже в серафи́мских, му́дрыми отцы́, о Тро́ице, Це́рковь онебеси́ся, трисвяту́ю пе́снь при́сно Тебе́ пою́щи, собира́ет Тро́ическое Твое́ Еди́но Божество́.
Богородичен: Ма́ти и раба́ Твоего́ Сы́на бы́ла еси́, Чи́стая, и́бо Иже из Тебе́ пре́жде Тебе́ бя́ше, я́ко Соде́тель Тво́й, Его́же во двою́ существу́ познава́ем и соединя́ем Сло́вом Ипоста́сным.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Бо́г бого́в Госпо́дь, — Дави́д, пре́жде воспе́в, — глаго́ла и призва́ от восто́к, от коне́ц всея́ земли́, да́же до за́пад и́х, — Вселе́нския Собо́ры оте́ц назна́менуя.
Се́дмь столпо́в утверди́ прему́дрость Бо́жия, Твою́ Це́рковь, Влады́ко, седмочи́сленными Собо́ры свяще́нных оте́ц неукло́нну соблюда́ему от вся́ких ересе́й.
Сты́д лица́ да покры́ет Евти́ха и Диоско́ра, слия́ние буесло́вивших естества́ Христо́ва: не в привиде́нии бо, но во обоже́нии естество́ земноро́дных прия́т.
Богородичен: Да во́змется Несто́рий во евре́йския те́мныя собо́ры, и язы́к же отсече́тся ху́льный: Бо́га бо роди́ Де́ва Мари́я, Плотоно́сца на́м.
Конда́к, гла́с 8.
Апо́стол пропове́дание и оте́ц догма́ты Це́ркве еди́ну ве́ру запечатле́ша, я́же и ри́зу нося́щи и́стины, истка́нну от е́же свы́ше богосло́вия, исправля́ет и сла́вит благоче́стия вели́кое та́инство.
Высо́ким пропове́данием Бо́жию Це́рковь услы́шим, вопию́щу: жа́ждай, да гряде́т ко мне́ и пие́т ча́шу, ю́же держу́, ча́ша е́сть прему́дрости. Сие́ питие́ и́стины сло́вом почерпо́х, во́ду пролива́ющую не прекосло́вия, но испове́дания, ю́же пия́, ны́нешний Изра́иль Бо́га зри́т, веща́юща: ви́дите, ви́дите, я́ко Са́м Аз е́смь и не пременя́юся: Аз Бо́г пе́рвый, Аз же и по си́х, и ра́зве Мене́, не́сть ино́го отню́д. Отсю́ду причаща́ющиися насы́тятся и восхва́лят благоче́стия вели́кое та́инство.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Вавило́нскаго у́бо зми́я разрази́ Дании́л пе́рвее, моли́твами же оте́ц прося́деся лю́тый еги́петский зми́й, я́ве Арий, пояда́ющий Христо́во ста́до.
Непроще́ным нече́стием негодова́ во́лк Македо́ний, прирази́вся Ду́ху, обожа́ющему челове́ки и вся́ ба́нею креще́ния на пе́рвую добро́ту вообража́ющу ве́рныя.
Диоско́р, и Евти́х, и Севи́р левиафа́м, трие́, слива́ющии и смеша́ющии Христо́ва существа́ смеше́нием у́мным, к Тро́ице Честне́й прирази́шася де́рзостию.
Богородичен: Плотска́го Твоего́ зра́ка о́браз, Влады́ко, че́стно облобыза́ем, и Ма́тере Твоея́, и святы́х все́х, по́честь ве́дяще пра́вым по́мыслом преходи́ти до́бре к первообра́зному.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Якоже еди́наго ко́рене о́трасли Богоса́дны, Сы́н и Ду́х возсия́вше: и́бо Оте́ц Единовино́вен е́сть, Безле́тный, Безле́тным Ли́цам Единоче́стен.
Из чре́ва невеще́ственна безле́тно возсия́л еси́, Единосу́щное Сло́во Отцу́ и Ду́ху, но на́с ра́ди в ле́тнюю всели́ся веще́ственную утро́бу еди́ныя Богоро́дицы.
Разжже́нныя стре́лы огне́м духо́вным в студе́ная сердца́ враго́в вонзо́шася еретико́в и на сме́рть удави́ша и́х совокупле́нии оте́ц седмочи́сленных и боже́ственных.
Богородичен: Не ли́цы Еди́наго Христа́ сла́вим, не смеше́нием существа́ Сего́ соединя́ем: Еди́н бо Сы́й и То́йже Лице́м, раздвоя́ется естествы́, Де́во, Тво́й Сы́н и Соде́тель.
Пе́снь 9.
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Не подоба́ет приложи́ти или́ оста́вити что́ свяще́ннаго преда́ния правосла́вныя на́шея ве́ры: в не́йже бо ве́рно крести́хомся, а и́же приложи́тели сея́ ве́ры впра́вду пре́дани бу́дут преще́нию прокля́тия.
Ра́достию се́рдца вси́ взыгра́им, свяще́нныя Собо́ры оте́ц совоку́пльше: те́х бо ра́ди све́т ви́дехом правосла́вия. Свети́льницы бо яви́шася, вся́ наставля́юще к пра́вым уче́ния обре́тением.
Душа́м испро́сим очище́ние и благоче́стно житие́ препроводи́ти потщи́мся, я́ко да прича́стницы бу́дем святы́м отце́м, и́же скры́ша пра́вых уче́ний бога́тство на́м, ча́дом и́х.
Богородичен: Бо́г от боку́ Твое́ю возсия́, Ма́ти Бо́жия, и челове́ческий ро́д обожи́, и сла́вы Своея́ сподо́би, и насле́дники вся́ показа́, и́же Тя́ Богоро́дицу вои́стинну при́сно пропове́дающия.
Свети́лен.
Оте́ц Боже́ственных дне́сь па́мять пра́зднующе, моле́ньми те́х мо́лим, Всеще́дре: вся́каго вре́да ересе́й изба́ви лю́ди Твоя́, Го́споди, и вся́ сподо́би Отца́, Сло́во сла́вити и Всесвята́го Ду́ха.
Богоро́дичен.
Ра́дуйся, Бо́жия пала́то. Ра́дуйся, горо́ присе́нная. Ра́дуйся, неопали́мая купино́. Ра́дуйся, престо́ле сла́вы. Ра́дуйся, Боже́ственная трапе́зо. Ра́дуйся, ру́чко всезла́тая. Ра́дуйся, свети́льниче всесве́тлый. Ра́дуйся, ле́гкий о́блаче, Де́во Ма́ти Мари́е.
Величание святым отцам шести вселенских соборов
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
П редстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти; ускори на молитву и потщися на умоление, предстательствующи присно Богородице, чтущих Тя.
В еличаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.
Прокимен, гл.3 Песнь Богородицы.
В еличит душа Моя Господа, и возрадовася дух Мой о Бозе Спасе Моем.
Ч ашу спасения прииму и Имя Господне призову.
Н ебесных воинств Архистратизи, молим вас присно мы, недостойнии, да вашими молитвами оградите нас кровом крил невещественныя вашея славы, сохраняющее нас, припадающих прилежно и вопиющих: от бед избавите нас, яко чиноначальницы Вышних Сил.
А рхистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко безплотных Архистратизи.
В еличаем вас, Архангели и Ангели и вся воинства, Херувими и Серафими славящии, Господа.
Прокимен, гл.4 и Причастен.
Т воряй ангелы Своя духи, и слуги Своя пламень огненный.
П ророка Твоего (имярек) память, Господи, празднующе, тем Тя, молим, спаси души наша.
П росветившееся Духом чистое твое сердце пророчества бысть светлейшаго приятелище: зриши бо, яко настоящая, далече сущая; сего ради тя почитаем, пророче блаженне (имярек), славне.
В еличаем тя, святый пророче Божий (имярек), и чтим святую память твою, ты бо молиши о нас Христа Бога нашего.
Т ы иерей вовек по чину Мелхиседекову.
В память вечную будет праведник, от слуха зла не убоится.
А постоле святый (имярек), моли Милостиваго Бога, да прегрешений оставление подаст душам нашим.
Я ко звезду пресветлую Церковь всегда стяжа тя, апостоле (имярек), чудес твоих многоподаванием прсвещаема. Темже зовем Христу: спаси чтущих верою память Твоего апостола, Многомилостиве.
В еличаем тя, апостоле Христов (имярек), и чтим болезни и труды твоя, имиже трудился еси во благовестии Христове.
Прокимен, гл. 8 и Причастен.
В о всю землю изыде вещание их, и в концы вселенныя глаголы их.
А постоли святии, молите Милостиваго Бога, да прегрешений оставление подаст душам нашим.
Л озие явистеся Христова винограда, мудрии, гроздие приносяще в добродетелех, вино нам спасения источающее; егоже приемлем, веселия исполняющеся. Празднуем честную вашу память, в нюже молите дароватися нам велицей милости и отпущению грехов, Господни апостоли.
В еличаем вас, святии апостоли, весь мир ученьми своими просветившия и вся концы ко Христу приведшия.
Прокимен, гл.8 и Причастен.
В о всю землю изыде вещание их, и в концы вселенныя глаголы их.
Святым отцам Вселенских Соборов.
П репрославлен еси, Христе Боже наш, светила на земли отцы наша основавый, и теми ко истинней вере вся ны наставивый: Многоблагоутробне, слава Тебе.
А постол проповедание и отец догматы Церкве едину веру запечатлеша: яже и ризу носящи истины, исткану от еже свыше богословия, исправляет и славит благочестия великое таинство.
Прокимен, гл.4 Песнь отцев.
Б лагословен еси, Господи, Боже отец наших, и хвально, и прославлено имя Твое во веки.
Р адуйтеся, праведнии, о Господе, правым подобает похвала.
П равило веры и образ кротости, воздержания учителя, яви тя стаду твоему яже вещей Истина, сего ради стяжал еси смирением высокая, нищетою богатая, отче священноначальниче (имярек), моли Христа Бога спастися душам нашим.
П равославия наставниче, благочестия учителю и чистоты, вселенныя светильниче, архиереев ( или: монашествующих) Богодухновенное удобрение, (имярек) премудре, ученьми твоими вся просветил еси, цевнице духовная, моли Христа Бога спастися душам нашим.
Б ожественный гром, труба духовная, веры насадителю и отсекателю ересей, Троицы угодниче, великий святителю (имярек), со ангелы предстоя присно, моли непрестанно о всех нас.
В еличаем тя, святителю отче (имярек), и чтим святую память твою: ты бо молиши о нас Христа Бога нашего.
У ста моя возглаголют премудрость, и поучение сердца моего разум.
В память вечную будет праведник, от слуха зла не убоится.
Боже отец наших, творяй присно с нами по Твоей кротости, не остави милость Твою от нас, но молитвами их в мире управи живот наш.
Я ко добродетелей учителие и иерархов украшение, Церковь, поющи, вас славит: молитвами вашими подайте чтущим вас любовию добродетелей исправление и соблазнов избавление, яко непобедимии.
В еличаем вас, святителие велицыи, и чтим святую память вашу, вы бо молите о нас Христа Бога нашего.
В память вечную будет праведник, от слуха зла не убоится.
М ученик Твой, Господи, (имярек), во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.
З везда светлая явился еси непрелестная мирови, Солнца Христа возвещающи зарями твоими, страстотерпче (имярек), и прелесть погасил еси всю, нам же подаеши свет, моляся непрестанно о всех нас.
В еличаем тя, страстотерпче святый (имярек), и чтим честная страдания твоя, яже за Христа претерпел еси.
В озвеселится праведник о Господе, и уповает на Него.
В память вечную будет праведник, от слуха зла не убоится.
М ученицы Твои, Господи, во страданиих своих венцы прияша нетленныя от Тебе, Бога нашего: имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.
С ветильницы светли явльшеся, Божественнии мученицы, тварь всю светлостию чудес озаряете, недуги разрешающе и глубокую тьму всегда отгоняюще, Христу Богу молящеся непрестанно о всех нас.
В еличаем вас, страстотерпцы святии, и чтим честная страдания ваша, яже за Христа претерпели есте.
С вятым, иже суть на земли Его, удиви Господь вся хотения Своя в них.
Р адуйтеся, праведнии, о Господе, правым подобает похвала.
А гница Твоя, Иисусе (имярек), зовет велиим гласом: Тебе, Женише мой, люблю, и Тебе ищущи, страдальчествую и сраспинаюся и спогребаюся Крещению Твоему и стражду Тебе ради, яко да царствую в Тебе и умираю за Тя, да и живу с Тобою; но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.
Х рам твой всечестный, яко цельбу душевную обретше, вси вернии велегласно вопием ти: Дево мученице (имярек) великоименитая, Христа Бога моли непрестанно о всех нас.
В еличаем тя, страстотерпице Христова (имярек), и чтим честное страдание твое, еже за Христа претерпела еси.
Д ивен Бог во святых Своих, Бог Израилев.
Р адуйтеся, праведнии, о Господе, правым подобает похвала.
А гницы словесныя Агнцу и Пастырю приведостеся мучением ко Христу, течение скончавше и веру соблюдше: темже днесь радостною душею совершаем, досточуднии, святую вашу память, Христа величающе.
С трастотерпиц Христовых память празднуим, и верою просяще помощи, избавитися всем от всякия скорби, зовуще: Бог наш с нами, иже сих прославивый, якоже изволи.
В еличаем вас, страстотерпицы святыя, и чтим честная страдания ваша, яже за Христа претерпели есте.
Д ивен Бог во святых своих, Бог Израилев.
Р адуйтеся, праведнии, о Господе, правым подобает похвала.
И нравом причастник, и престолом наместник апостолом быв, деяние обрел еси, Богодухновенне, в видения восход: сего ради, слово истины исправляя, и веры ради пострадал еси даже до крове, священномучениче (имярек). Моли Христа Бога спастися душам нашим.
В о святителех благочестно пожив и мучения путь прошед, идольския угасил еси жертвы, и поборник быв твоему стаду, богомудре. Темже тя почитающе, тайно вопием ти: от бед избави ны присно твоими мольбами, отче наш (имярек).
В еличаем тя, священномучениче (имярек), и чтим святую память твою: ты бо молиши о нас Христа Бога нашего.
В осхвалятся преподобнии во славе, и возрадуются на ложах своих.
В память вечную будет праведник, от слуха зла не убоится.
Б оже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.
Я ко светильники незаходимыя Разумнаго Солнца, сошедшеся днесь, восхвалим песньми: возсияли бо есте сущим во тьме неразумия, всех созывающе к высоте благочестия, священномученицы. Тем вопием вам: радуйтеся, постников всех основание.
В еличаем вас, священномученицы Христовы, и чтим святую память вашу: вы бо молите о нас Христа Бога нашего.
Р адуйтеся праведнии о Господе, правым подобает похвала.
В тебе, отче, известно спасеся еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со ангелы срадуется, преподобне (имярек), дух твой.
Я ко постника благочестна, и искусна, и страдальца произволением честна, и пустыни жителя сообразна, в песнех достойно восхвалим, (имярек), той бо змия попрал есть.
У блажаем тя, преподобномучениче (имярек), и чтим святую память твою, наставниче монахов и собеседниче ангелов.
Б оже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.
В олнений множество невлажно преходяще, безплотныя враги струями слез ваших крепко погрузили есте, преподобнии мученицы, и чудес дар приимше, молите непрестанно о всех нас.
У блажаем вас, преподобнии мученицы, и чтим святую память вашу, наставницы монахов и собеседницы ангелов.
В осхвалятся преподобнии во славе, и возрадуются на ложах своих.
Радуйтеся праведнии о Господе, правым подобает похвала.
А гница Твоя, Иисусе (имярек), зовет велиим гласом: Тебе Женише мой люблю, и Тебе ищущи, страдальчествую и сраспинаюся и спогребаюся, Крещению Твоему и стражду Тебе ради, яко да царствую в Тебе и умираю за Тя, да и живу с Тобою: но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.
Б ожественная память твоя, (имярек), днесь возсиявши, явися мирови яко солнце, сказующи житие твое: ты бо воздержанием плотская двизания разорши, и страдания кровию уневестилася еси Христови. Темже хвалящия тя избави от всяких зол, да зовем ти: радуйся, мати преподобная.
В еличаем тя, страстотерпице святая (имярек), и чтим святую память твою: ты бо молиши о нас Христа Бога нашего.
Священноисповеднику и преподобноисповеднику.
П равославия наставниче, благочестия учителю и читоты, вселенныя светильниче, архиереев богодухновенное удобрение, (имярек) премудре, ученьми твоими вся просветил еси, цевнице духовная. Моли Христа Бога спастися душам нашим.
Н асладився, богомудре, воздержания, и желания плотская ты успил еси, явився верою возращаемь, и яко живота древо райское процвел еси, (имярек), отче священный.
В еличаем тя, святителю отче (имярек), и чтим святую память твою: ты бо молиши о нас Христа Бога нашего.
У блажаем тя, преподобне отче (имярек), и чтим святую память твою: ты бо молиши о нас Христа Бога нашего.
В тебе, отче, известно спасеся еже по образу: приим бо Крест, последовал еси Христу и дея учил еси презирати убо плоть, преходит бо, прилежати же о души, вещи безсмертней; темже и со ангелы срадуется, преподобне (имярек), дух твой.
П устынный житель и в телеси Ангел, и чудотворец явился еси, богоносе отче наш (имярек), постом, бдением, молитвою небесная дарования приим, исцеляеши недужныя и души верою притекающих ти. Слава Давшему ти крепость, слава Венчавшему тя, слава Действующему тобою всем исцеления.
С лез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, (имярек), отче наш, моли Христа Бога спастися душам нашим.
Ч истотою душевною Божественне вооружився и непрестанныя молитвы, яко копие, вручив крепко, пробол еси бесовская ополчения, (имярек), отче наш, моли непрестанно о всех нас.
У блажаем тя, преподобне отче (имярек), и чтим святую память твою, наставниче монахов и собеседниче ангелов.
В память вечную будет праведник, от слуха зла не убоится.
Б оже отец наших, творяй присно с нами по Твоей кротости, не остави милость Твою от нас, но молитвами их в мире управи живот наш.
В олнений множество невлажно проходяще, безплотныя враги струями слез ваших крепко погрузили есте, богомудрии и преподобнии, и чудес дар приимше, молите непрестанно о всех нас.
У блажаем вас преподобнии отцы, и чтим святую память вашу, наставницы монахов и собеседницы Ангелов.
В память вечную будет праведник, от слуха зла не убоится.
В тебе, мати, известно спасеся еже по образу: приимши бо Крест, последовала еси Христу и деющи учила еси презирати убо плоть, преходит бо, прилежати же о души, вещи безсмертней; темже и со ангелы срадуется, преподобная (имярек), дух твой.
З а любовь Господню, преподобная, покоя желание возненавидела еси, пощением дух твой просветивши: крепко бо звери победила еси; но молитвами твоими противных шатание разори.
У блажаем тя, преподобная мати (имярек), и чтим святую память твою: ты бо молиши о нас Христа Бога нашего.
Д ивен Бог во святых своих, Бог Израелев.
В память вечную будет праведник, от слуха зла не убоится.
И стинному желанию унивестившеся, Христославнии, и временнаго обручника отвергшеся совокупления, и добродетельными подвиги возрастше, на высоту востекосте нетления, краснодушнии и многобогатии, столпи монашествующих жен и правило: темже о нас молите непрестанно, любовию вашу память празднующих.
Т елеса своя постом изнурившее и неусыпными молитвами моляще Зиждителя о гресех своих, яко да приимите совершенное прощение, и приясте Божественное оставление, и Царствие Небесное: молите Христа Бога о всех нас.
У блажаем вас, преподобнии матери, и чтим святую память вашу: вы бо молите о нас Христа Бога нашего.
Д ивен Бог во святых своих, Бог Израелев.
В память вечную будет праведник, от слуха зла не убоится.
С вятии безсребреницы и чудотворцы, посетите немощи наша: туне приясте, туне дадите нам.
Б лагодать приимше исцелений, прстираете здравие сущим в нуждах, врачеве, чудотворцы преславнии; но вашим посещением ратников дерзости низложите, мир исцеляющее чудесы.
В еличаем вас, чудотворцы славнии (имярек), и чтим честная страдания ваша, яже за Христа претерпели есте.
С вятым, иже суть на земли Его, удиви Господь вся хотения Своя в них.
Р адуйтеся праведнии о Господе, правым подобает похвала.
Христа ради юродивым.
Г лас апостола Твоего Павла услышав, Глаголющ: мы юроди Христа ради, раб Твой, Христе Боже, (имярек), юрод бысть на земли Тебе ради; темже память его почитающе, Тебе молим Господи, спаси души наша.
В ышния красоты желая, и нижния сласти телесныя тщно оставил еси, нестяжанием суетнаго мира, ангельское житие проходя, скончався, (имярек), блаженне; с нимиже Христа Бога моли непрестанно о всех нас.
У блажаем тя, святый праведный (имярек), и чтим святую память твою: ты бо молиши о нас Христа бога нашего.
В осхвалятся преподобнии во славе, и возрадуются на ложах своих.
Р адуйтеся праведнии о Господе, правым подобает похвала.
Новости
Благодарность
Искренне благодарю Дмитрия Г. за оказанную материальную помощь на развитие сайта.
Благодарность
Искренне благодарю Наталью Михайловну Ч. и Татьяну Александровну Т. за оказанную материальную помощь на развитие сайта.